ҰЛТТЫҚ ҚҰНДЫЛЫҚТАРДЫҢ ИНТЕРНЕТ-ТҮСІНДІРМЕЛЕРДЕГІ КӨРІНІСІ: ДӘСТҮР МЕН ЖАҢАШЫЛДЫҚ

Аңдатпа

Дәстүрлі мәдени құндылықтар мен заманауи технологиялардың қарқынды дамуының түйіскен тұсында халықтың тарихи-мәдени құндылықтарын бейнелейтін және тілдік санасында қалыптасатын лингвомәдени бірліктерді зерделеу қазіргі уақытта маңызды мәселе болып отыр. Бұл бірліктер халықтың дүниетанымын көрсетумен қатар, ұлттық бірегейлікті сақтап, мәдени дәстүрді жаңғыртуға үлес қосады. Лингвомәдени бірліктер ұлттық тіл мен мәдениеттің өзара байланысын айқындап, қоғамның мәдени және рухани өміріне зор ықпал етеді. Мақалада бүгінгі қазақстандық интернет-пайдаланушылардың түсіндірмелерінде ұшырасатын аталған лексемалар зерттеу нысанына алынып, жан-жақты қарастырылады. Ол сипаттау, баяндау, лингвомәдени тұрғыдан талдау әдіс-тәсілдері арқылы жүзеге асырылады. Нәтижесінде лингвомәдени компоненттерді қамтитын мысалдар семантикалық ерекшеліктеріне қарай мифологиялық, фразеологиялық, паремиологиялық, поэтикалық, тілек, бата түріндегі бірліктер мен діни және ұлттық-спецификалық сөздер (реалийлер) сынды параметрлерге жіктеледі. Бұл бірліктер қазақ лингвомәдениетінің құндылық бейнесін модельдейтін коммуниканттардың ұлттық санасын көрсетуге, қазақ халқының әлемдік бейнесін қайта жаңғыртуға ықпал етеді.