СТУДЕНТТЕРДІҢ СӨЙЛЕУ МӘДЕНИЕТІН ДАМЫТУ ӘДІСТЕРІ

Аңдатпа

Университет студенттері арасында сөйлеу мәдениетін зерттеу лингвистикалық, әлеуметтік-мәдени, психологиялық және технологиялық факторларды қамтитын күрделі және жан-жақты жұмыс. Бұл жұмыс сөйлеу мәдениеті тұжырымдамаларын анықтауға және нақтылауға, оның дамуына әсер етуші факторларға назар аударуға, университет студенттерінің сөйлеу мәдениетінің қазіргі деңгейін талдауға, түрлі мәселелер мен қиындықтарды анықтауға, сөз мәдениетін жетілдіру мақсатында стратегиялық жоспарлауға негізделген. Сөйлеу мәдениетін жетілдіру болашақ маман үшін академиялық даму және кәсіби алға басу үшін өте маңызды. Ауызша қарым-қатынас нормаларын сақтай отырып, студент жастардың түрлі іс-шараларда, күнделікті өмірде дұрыс сөйлеуі қоғам талқысында екені белгілі. Жастардың сөз тіркестерді дұрыс қолданбауы, диалект, орыс тілінен, басқа да шет тілдерден енген сөздерді көп қолдануы, жаргон сөздерді қосуы секілді бірқатар жастар тіліндегі қателіктердің көбеюі кез келген лингвист-зерттеушілерді алаңдатады. Одан бөлек, ел алдында сөйлеуде қысылуы, екпінді дұрыс қоймауы, дауыс ырғағымен жұмыс жасамауы, сөйлеу барысында бейвербалды әрекеттердің дұрыс қолданыс таппауы сынды мәселелер көп студенттердің бойынан табылады. Сондықтан зерттеу барысында студенттердің нақты тілдік шеберліктерін қалыптастыру жолы, жетілдіру жолы, қателіктермен күресу жолдары зерттелді. Эксперимент  жасалып, нәтижелері көрсетілді.