МИСТИКАЛЫҚ ӘҢГІМЕЛЕРДЕГІ ДЫБЫСТЫҚ ДЕТАЛЬДЫҢ ҚЫЗМЕТІ

Аңдатпа

Зерттеуде мистикалық әңгімелердегі детальдың қолданысы, қызметі сынды мәселелерге тоқтала отырып, авторлар деталь түрлеріне ерекше мән береді. Соның ішінде дыбыстық (акустикалық) детальдың мистикалық фон, атмосфера берудегі рөлін анықтап, мәтіндік талдаулар арқылы ажыратуды мақсат етеді. Акустикалық детальдың мистикадағы тартысты ширатып, кейіпкердің психологиялық көңіл-күйімен қатар, фобиясын (үрей, қорқыныш) көрсетудегі маңызы сарапталады. Детальдың осы түріне қатысты ғылымда айтылған еңбектерді кеңінен қарастыра отырып, ғылыми пайымдаулардың негізінде дыбыстың адам ағзасына, жүйке жүйесіне тигізетін әсерін деталь арқылы көрсетіп отырады. Ганс Дженни, Ганс Кайзер, Дон Кэмпбелл, Мэннерс, Ричард Левитандар дауыстың адамның жан-дүниесіне, ойлау жүйесіне, жалпы денсаулығына тигізетін оң әсерін көрсеткенін ескере отырып, авторлар дауыстың акустикалық деталь ретіндегі мистикадағы рөліне алғаш болып талдау жасайды. Нәтижесінде дыбыстық детальдың мистикада атқаратын қызметі нақтыланады.